Зейнетақы өсуде: Қазақстанда орташа зейнетақы мөлшері 143,8 мың теңгеге жетті
Қазақстанда зейнетақы төлемдері жыл сайын артып келеді. 2025 жылғы 1 наурыздағы мәліметке сәйкес, еліміздегі зейнеткерлердің орташа зейнетақысы 143 800 теңгені құрайды. Оның ішінде ынтымақты зейнетақының орташа мөлшері – 96 117 теңге, ал базалық зейнетақы – 47 683 теңге.
Зейнетақы төлемдеріне қанша қаражат бөлінді?
Жыл басынан бері республикалық бюджеттен 694,7 млрд теңге зейнетақы төлемдеріне жұмсалды. Оның ішінде:
- Базалық зейнетақы төлемдеріне – 224,5 млрд теңге;
- Ынтымақты зейнетақыға – 470,2 млрд теңге бөлінді.
Зейнетақы қалай және қаншалықты өседі?
2025 жылғы 1 қаңтардан бастап зейнетақы мөлшері инфляция деңгейін ескере отырып ұлғайтылды:
- Базалық зейнетақы төлемі 6,5%-ға артты;
- Ынтымақты зейнетақы 8,5%-ға ұлғайтылды, бұл инфляция деңгейінен 2%-ға жоғары өсім.
Сонымен қатар, Мемлекет басшысының тапсырмасына сәйкес, 2023 жылдан бастап бес жыл ішінде базалық зейнетақының ең төменгі мөлшерін ең төменгі күнкөріс деңгейінің 70%-ына, ал ең жоғары мөлшерін 120%-ға дейін кезең-кезеңімен өсіру жоспарланған.
2025 жылы базалық зейнетақының жаңа мөлшері қандай?
2025 жылғы 1 қаңтардан бастап:
- Базалық зейнетақының ең төменгі мөлшері ең төменгі күнкөріс деңгейінің 65%-ынан 70%-ына дейін көтерілді. Бұл 32 360 теңгені құрайды.
- Ең жоғары мөлшері 105%-дан 110%-ға дейін өсіп, 50 851 теңгеге жетті.
Зейнетақы төлемдерінің жыл сайын көтерілуі зейнеткерлердің әл-ауқатын жақсартуға бағытталған маңызды қадамдардың бірі болып табылады.
