Жамбыл облысында «Ежелгі Тараз ескерткіштері» тарихи-мәдени қорық-музейінің аумағында заңсыз кәсіпкерлікпен айналысқан тұлғаларға қатысты сот шешімі шықты.
Қорық-музей әкімшілігі бес кәсіпкердің тарихи-мәдени аумақта заңсыз сауда жасап жатқанын айтып, сотқа жүгінді. Айша-Бибі кесенесі орналасқан жер ерекше қорғалатын табиғи аймаққа жатады, оның аумағы тек тарихи-мәдени, рекреациялық және сауықтыру мақсатында пайдаланылуы тиіс.
Алайда, кәсіпкерлер бұл аумақтағы техникалық ғимараттарды заңсыз иемденіп, оларды коммерциялық мақсатта пайдаланған.
Сот шешімі
Қорық-музей басшылығы кәсіпкерлердің ғимараттарды босатуын талап етті. Сотта кәсіпкерлердің төртеуі өз әрекеттерін заңды деп санап, айыптарды мойындаудан бас тартты. Олардың бірі бұл нысандарды 2010 жылы өз қаражатына салып, кейін өзгелерге тегін бергенін мәлімдеді. Ал бесінші кәсіпкер талапты мойындады.
Жамбыл аудандық соты кәсіпкерлердің қорық-музей аумағындағы ғимараттарды заңсыз иемденгенін анықтап, оларды босатуға міндеттеді. Жауапкерлер апелляциялық шағым түсіргенімен, Жамбыл облыстық соты бастапқы шешімді өзгеріссіз қалдырды.
Қорық-музей әкімшілігі тарихи-мәдени мұраларды қорғау мақсатында бұл аумақта кез келген коммерциялық қызметке қатаң тыйым салынғанын тағы да ескертті.
