Пхеньян қаласы жедел респираторлық инфекцияның өршуіне байланысты карантинге жабылды
Пхеньяндықтар үйден шықпай, дене қызуын үнемі тексеріп тұруы керек. Бұл қалада соңғы сегіз айда алғаш рет карантин шектеуң енгізілді
Солтүстік Корея билігі сәрсенбіден бастап Пхеньян қаласының тұрғындарына бес күндік карантин режимін енгізуді бұйырды. Бұған жедел респираторлық аурулардың көбеюі себеп болып отыр, деп жазды NK News.
Пхеньяндықтар тауар мен дәрі-дәрмекті жаппай сатып ала бастады.
Ел билігі қазір астанада кәдімгі тұмау кең таралып жатқанын мәлімдеді, бірақ COVID-19 туралы ештеңе айтылмайды.
Өткен тамыз айында Солтүстік Корея елде COVID-19 вирусы толығымен жойылғанын хабарлады. Соңғы рет карантин 2022 жылғы мамырда енгізілді, ол екі аптадан астам уақытқа созылды.
Билік сонымен қатар COVID-19 індеті туралы қауесет таратып, тапшы дәрілерді заңсыз жолмен сатуға тырысқандар өлім жазасына кесілетінін ескертті.
