Ойлылар ойыны саналатын дойбыдан жерлестеріміздің жеткен жетістіктері аз емес. Тәжірибелі спортшыларымыз талай дүбірлі додада топ жарып, тұғыр биігінен көрініп жүргенін бұдан бұрын да жазғанбыз. Белгілі жаттықтырушылар Берік Пшанов пен Жаухар Дәуренбековадан шеберлігін шыңдаған жастар Жамбыл облысы құрама сапында өнер көрсетіп, мықтылығын мойындатып келеді.
Қаратаулық дойбышылар жуырда Шымкент қаласында өткен Қазақстан Республикасы чемпионатында күткен үдеден көрініп, артқан сенімді толығымен ақтады.
Он күнге созылған бәсеке ерлер, әйелдер және жастар арасында ұйымдастырылды. Өңір намысын қорғаған қаратаулық Арайлым Мейірбек жастар арасында дойбының классика түрінен жеңімпаз атанды. Ал, Динислам Мейрамбекке сәл ғана сәттілік жетіспегенімен, чемпионатты 2-орынмен аяқтады. Сондай-ақ, осы жарыста жастар арасында бақ сынаған Дариға Базарқұл үздік үштіктен көрініп, көптің мерейін өсірді.
Жалпы, Жамбыл облысы құрамасынан ел чемпионатына қатысқан төрт спортшы да жүлделі орындардан көрінді.
Ал, тұғыр биігінен көрінген жерлесіміз Арайлым Мейірбек алдағы сәуір айында Ташкент қаласында өтетін Азия чемпионатында ел намысын қорғайтын болады. Арайлымға сәттілік серік болсын дейміз.
