Биылғы түскен қалың қар мен ерте көктемнен басталған толассыз жауын еліміздің бірқатар өңірлерінде су тасу қаупін үдетті.
Олардың қатарында Қостанай, Солтүстік Қазақстан, Батыс Қазақстан, Павлодар, Қарағанды, Абай, Ақмола облыстары бар. Әсіресе сарқынды судан Ақтөбе облысының халқы қатты зардап шегіп жатыр. Мұнда аудандармен қатар Ақтөбе қаласында да су деңгейі көтеріліп, тұрғындарды әбігерге салуда.
Көптің басына түскен қиындыққа бейжай қарамаған азаматтар қолдан келгенше көмектерін танытып жатыр. Елге ортақ, сауапқа толы қайырымдылық шараларынан қаратаулықтар да тыс қалған жоқ. «Қаратау қайырымдылық қорының» ұйымдастыруымен қала әкімі аппараты, білім беру, құқық қорғау және әлеуметтік қызмет көрсету мекемелері мамандарының, сонымен қатар қала тұрғындары өз тараптарынан жылу жинап, гуманитарлық көмек тиелген көлікті Ақтөбе облысына жөнелтті.
Екі жарым тоннаны құрайтын жүктің қатарында күнделікті тұтынатын азық-түлік өнімдері, гигиеналық заттар мен киімдер бар.
