Апта басында Қаратау қаласында тағы бір көппәтерлі тұрғын үй пайдалануға берілді.
Б.Момышұлы көшесінде орналасқан 80 пәтерлі тұрғын үйді қайта жаңғырту жұмыстары өткен жылдың тамыз айында басталған болатын. Жалпы ауданы 5091,0 шаршы метрді құрайтын 5 қабатты үйдің жөндеу жұмыстарын мердігер мекеме «CONDOR KZ» ЖШС жүргізген.
Шараға аудан әкімі Нұрбол Жүнісбеков қатысып, тұрғындарды баспаналы болуымен құттықтады.
— Бүгін ерекше күн. Тұрғындар көптен күткен баспанаға қол жеткізді. Шаңырақ-тарыңыздан шаттық, босағаларыңыздан бақыт кетпесін. Әр шаңырақта береке -бірлік, ырыс – ынтымақ салтанат құрсын, — деді аудан басшысы өз сөзінде.
Шарада баспана кілтін аудан әкімі Нұрбол Жүнісбеков, аудандық ардагерлер кеңесінің төрағасы Жұмабек Әсемов және аудандық мәслихат төрағасы Қадірбек Садубаев тұрғындарға салтанатты жағдайда табыстады.
