Қазақ даласының оңтүстік өлкесін бойлап жатқан қырық қатпарлы Қаратау ұлтымыз ұлық тұтқан киелі мекеннің бірі.
Байтақ даламыздың көркін кіргізіп, ажарына әр берген, елге нәр берген таңғажайып мекен жаратқанның бізге берген үлкен сыйы. Табиғатқа тіл бітсе, тарихтың талай құпиясы ашылар ма еді. Таудың әрбір тасына қарасаң, ішіне бір құпияны бүгіп жатқандай көрінеді. Қарай бергің келеді, жанарыңды жаулайды. Көңіліңе қуаныш сыйлайды.
Өзге елдер тас қалашығы мен қызыл құмына, алақандай аймағына туристер тартып, қазынасын молайтып жатыр. Қазынасын ғана толтырмай, өздерінің мәдениеті мен танымын танытып, ұрпағына мол мұра қалдыруда.
Табиғаттың әсем көрінісін әлемге паш етіп, еліміздің туристік бағытын дамыту үшін жүйелі жұмыстар қолға алынып жатқаны белгілі. Дегенмен де кенжелеп жатқаны жасырын емес.
Ауданымызға қарасты Есейхан ауылының аумағындағы Қаратау жотасында қызғалдақтар фестивалі өтті.
Арнайы мемлекеттік бағдарла-малар шеңберінде ұйымдасты-рылған фестивалге отандық турагенттіктер мен шетелдік туристік агенттіктердің өкілдері, этномәдени бағытта жұмыс жасайтын қолөнершілер, туризм сласының мамандары мен арнайы шақырылған қонақтар қатысты.
Жанарды жаулаған қызғалдақтар фестиваліне жауапты болған аудан әкімдігі кәсіпкерлік, өнеркәсіп және туризм бөлімі шараға тыңғылықты дайындық жасағаны көрініп тұрды. Жотаға тігілген ақшаңқан қазақтың киіз үйлері, тау етегінде самал желмен тербелген алтыбақан, этнобұйымдар қойылған ашық аспан астындағы жәрмеңке табиғаттың ажарын аша түсті. Әсіресе, жергілікті жердегі қолөнер шеберлерінің бұйымдары қонақтарды қызықтыра түсті.
Г.Жолдасбекова, Г.Жаңабай, В.Мұратбекова, Р.Нұрбек және Л.Естебекова сынды шеберлердің қолынан шыққан қазақы тақиялар мен киімдер, балалар киімі, моншақты әшекейлер, үйге арналған жабдықтар, кесте бұйымдары туристерді қызықтырып, өнерлеріне тәнті етті.
Фестивальде Ұлбике ақын атындағы мәдениет орталығының өнерпаздары шырқаған әндер қызғалдағы құлпырған Қаратау жотасын әуезді әуенге бөледі.
