Орталық стадионда 2011 жылы туған жасөспірімдер арасында Қазақстан Республикасының біріншілігі өтті. Байрақты бәсекеге еліміздің әр өңірінен келген 10 команда өзара мықтыны анықтады. Атап айтсақ, Ақтөбе облысының өзінен Алға, Қобда, Кеңқияқ, Атырау облысының Махамбет, Шығыс Қазақстанның Зайсан, Түркістанның Сайрам, Түлкібас аудандарынан, сонымен қатар, Маңғыстау облысы мен таластық жас спортшылар қатысты.
Жасыл алаңға шығып, доп теуіп төселген жасөспірімдер командалары арасында үздікті анықтау оңайға соққан жоқ. 5 күнге созылған жарыс барысында еліміздің әр өңірінен келген құрамалар тыңғылықты дайындықтары мен жасыл алаңдағы ойын шеберліктерімен ерекшелене білді.
Жарыс қорытындысы бойынша 1-орынға Түркістан облысы Сайрам ауданы командасы тұрақтаса, 2-орынды маңғыстаулық жасөспірімдер еншіледі. Ал үздік үштікті Шығыс Қазақстан облысы Зайсан ауданының жас спортшылары түйіндеді.
Айта кетерлігі футболдан ауыл жасөспірімдері арасындағы Қазақстан Республикасының біріншілігі Қаратау қаласында алғаш рет ұйымдастырылып отыр. Жарыстың жоғары деңгейде өтуіне «Фосфорит-Шәріп» қоры ықпал етті.
