Партияның мәжіліс залында «Amanat» партиясы Талас аудандық мәслихатындағы депутаттық фракция жиналысы болып өтті.
Жиын Президент Қ.Тоқаевтың Жолдауында жүктелген міндеттерді орындау барысына арналды. Басқосуға мәслихат депутаттары мен бастауыш партия ұйымдарының төрағалары қатысты.
Отырысты «Amanat» партиясы Талас аудандық мәслихатындағы депутаттық фракциясының жетекшісі Д.Мәселбеков ашып, жүргізіп отырды.
Жиында «Amanat» партиясы Талас аудандық филиалының атқарушы хатшысы Ғ.Қартабаев Қасым-Жомарт Тоқаевтың «Әділетті Қазақстан: заң мен тәртіп, экономикалық өсім, қоғамдық оптимизм» атты Жолдауына байланысты баяндама жасады.
— Мемлекет басшысының бұл жолғы жолдауы бұған дейінгі жолдауларынан және сайлау алдындағы бағдарламасынан бастау алған реформаларды одан әрі дамытуға арналды. Мемлекет басшысы өз сөзінде азаматтардың тұрмысын жақсартуды көздейтін жүйелі экономикалық өзгерістерге баса назар аударды. Сонымен қатар, еліміздің саяси және әлеуметтік-экономикалық даму перспективаларына қатысты мәселелерді қамтыды,- дей келіп, Жолдау жолдарындағы өзекті мәселелер мен тапсырмаларға тоқталып, жүктелген міндеттерді бірлесе орындау қажеттігін тілге тиек етті.
Келесі кезекте жарыссөзге жазылған аудандық ардагерлер кеңесінің төрағасы Ж.Әсемов пен «Денсаулық» бастауыш партия ұйымының төрағасы Б.Каленов Жолдау жүктеген міндеттерге қатысты пікірлерін білдірді.
Жиын соңында депутаттық фракция жиналысының шешімі шығарылды.
