Қоғам дерті саналатын сыбайлас жемқорлықпен күрес бүгінгі күннің басты әрі күрделі мәселесі саналып отырғаны белгілі. Үлкен әлеуметтік індет болып табылатын құбылыс тек елімізді ғана емес, әлем мемлекеттерінің барлығын алаңдатады.
Түйткілді мәселеге қатысты Мемлекет басшысы Қасым-Жомарт Тоқаев: — Мемлекеттік органдар қанша тырысса да, қоғамның қолдауынсыз жетістікке жете алмайды. Азаматтарда адалдық идеологиясы қалыптасуы тиіс. Қазір бұл бағытта көптеген жұмыстар атқарылуда. Академиялық адалдық лигасы, сыбайлас жемқорлыққа қарсы еріктілері клубтары, адалдық дүгіршектері және өзіне — өзі қызмет ету касалары — осындай жобалар туралы кеңінен жариялауы керек, — деген болатын.
Мемлекет басшысы атап өткен жобалардың барлығы жемқорлықтың алдын алуға бағытталған. Расымен азаматтармен диалог орнату арқылы індеттің жолын кесіп, қоғам наразылығын тудырып жүрген түйткілді салаларды анықтауға болады. Ондағы мақсат сыбайлас жемқорлықпен толыққанды күресу арқылы халықтың құқықтық сауатын ашу және құқықтық түсіндіру жолдарын қарастыру болып табылады.
Бұл мәселеде тек жауапты сала өкілдері ғана емес, қоғам болып атсалысуымыз керек.
