Қазақстанның еңбек нарығы қарқынды өзгерістер мен жаңа талаптардың ортасында дамып келеді. Қазіргі уақытта құрылыс, өнеркәсіп, энергетика және ауыл шаруашылығы сияқты салаларда білікті жұмысшы кадрларға деген сұраныс айтарлықтай жоғары. Бұл елдің инфрақұрылымдық жобаларының қарқынды дамуы мен өндірістік әлеуеттің артуымен байланысты. Осыған орай, Президент Қасым-Жомарт Тоқаев 2025 жылды «Жұмысшы мамандықтардың жылы» деп жариялады. Бұл шешім еліміздегі еңбек адамының мәртебесін арттырып, жұмысшы мамандықтардың маңыздылығын қоғамға жеткізуге арналған маңызды қадам болды.
Жұмысшы мамандықтар кез келген мемлекеттің экономикалық негізін құрайды. Электрик, құрылысшы, дәнекерлеуші, механик сияқты мамандықтарсыз елдің инфрақұрылымы мен өнеркәсібі тұрақты дами алмайды. Алайда, қоғамда жұмысшы мамандықтарға деген қызығушылықтың төмендеуі байқалады. Көптеген жастар кеңсе немесе интеллектуалдық жұмысқа ұмтылады, ал физикалық еңбекке қызығушылық азайып келеді. Бұл үрдіс жұмысшы кадрлардың тапшылығына әкеліп, еңбек нарығында сұраныс пен ұсыныс арасындағы теңгерімді бұзады.
Жұмысшы мамандықтарға жастарды тарту және олардың мәртебесін арттыру бағытында мемлекеттік деңгейде ауқымды шаралар жүзеге асырылуда. Жастар ресурстық орталықтары бұл бағытта үлкен рөл атқаруда. Олар жастарды жұмысшы мамандықтармен таныстыру мақсатында экскурсиялар ұйымдастырады. Мысалы, Қаратау қаласының Жастар ресурстық орталығы жастарға «ЖШС ГКП Казфосфат Чулактау» өндіріс орнына экскурсиялар өткізіп, жастарды өндіріс орындарындағы нақты жұмысшы мамандықтардың ерекшеліктерімен таныстыруда. Мұндай іс-шаралар жастардың физикалық еңбекке деген қызығушылығын оятып, олардың кәсіби бағдарын айқындауға көмектеседі.
Сонымен қатар, жастар ресурстық орталығы бос жұмыс орындарының жәрмеңкелерін өткізіп, жас мамандардың еңбек нарығында өз орнын табуына көмектеседі. Президент жариялаған «Жұмысшы мамандықтардың жылы» аясында еңбек адамының беделін көтеруге арналған іс-шараларды белсенді түрде жүзеге асырып жатыр.
Еңбек нарығында жаңа технологиялар мен цифрландырудың ықпалы да айқын сезілуде. Жұмысшы мамандардан заманауи құрал-жабдықтарды меңгеру талап етіліп, олардың кәсіби деңгейін үнемі жаңартып отыру қажеттілігі туындап отыр. Осыған байланысты қысқа мерзімді кәсіптік оқыту бағдарламалары маңызды рөл атқарады. Бұл бағдарламалар жастарға сұранысқа ие мамандықтарды қысқа мерзімде меңгеруге мүмкіндік беріп, еңбек нарығына бейімделуін жеңілдетеді.
Ауылдық жерлердегі жастарды қолдау да басты назарда. Ауыл жастарын жұмысшы мамандықтарға тарту үшін арнайы бағдарламалар іске асырылып, инфрақұрылымды дамыту, еңбек жағдайларын жақсарту шаралары қолға алынуда. Мұның барлығы ауылдық өңірлердегі еңбек ресурстарының тапшылығын азайтып, аймақтардың дамуына септігін тигізеді.
Президенттің еңбек адамының беделін көтеруге ерекше назар аударуы жастардың осы салаларға деген көзқарасын өзгертуде маңызды рөл атқаруда. Еңбекқорлық пен жұмысшы мамандықтарды құрметтеу – елдің тұрақты дамуының кепілі. Жастардың осы құндылықтарды түсінуі мен бағалауы мемлекетіміздің болашағына инвестиция болып табылады.
Қазақстанның экономикалық тұрақтылығы мен дамуында жұмысшы мамандықтардың рөлі зор. Жұмысшы мамандықтарды насихаттау, еңбек адамының мәртебесін арттыру және жастарды осы салаға тарту бағытындағы бастамалар елдің еңбек нарығындағы тепе-теңдікті сақтауға мүмкіндік береді. Еңбек адамының еңбегін бағалау – ұлт болашағына жасалған маңызды қадам. Жұмысшы мамандықтарды дамыту арқылы біз жастарымызға лайықты болашақ қалыптастырып, еліміздің экономикалық әлеуетін арттырамыз.
Қаратау қалалық жастар ресурстық орталығының
жастар бөлімінің басшысы
Манатбек Сержан Сейсенбекұлы
